نااہلی کی انتہا، خاتون کے پیٹ میں تولیہ اور بیلٹ چھوڑدیا

راولپنڈی کے بشارت ہسپتال میں غفلت اور نااہلی کی انتہا ہوگئی، دورانِ آپریشن لیڈی ڈاکٹر نے مریضہ کے پیٹ میں تولیہ اور بیلٹ چھوڑدیا۔

ضلع چکوال سے وابستہ ماسٹر نثار کا کہنا ہے کہ دو ماہ قبل اُن کی 24 سالہ بیٹی عظمیٰ نثار کے پیٹ میں درد ہوا تھا، اُسے رسولی کی شکایت تھی۔ ہم چیک اپ کیلئے ہسپتال لے کرگئے، چیک اپ کے بعد ڈاکٹرز نے آپریشن کروانے کا بولا۔

بشارت ہسپتال کی لیڈی ڈاکٹر نازش نے بیٹی کے آپریشن کے دوران اُس کے پیٹ میں تولیہ اور بیلٹ چھوڑدیا، جس کا ہمیں دو مہینے کے بعد پتہ چلا۔

انہوں نے کہا کہ آپریشن کے 2 ماہ بعد بھی بیٹی کی طبیعت ٹھیک نہیں ہوئی بلکہ درد اور تکلیف میں مزید اضافہ ہونے لگا، جس پر ہارٹ انٹرنیشنل ہسپتال راولپنڈی میں چیک کرایا۔

دوبارہ چیک اپ کے دوران انکشاف ہوا کہ پہلے کیے گئے آپریشن کے اوزار تولیہ اور بیلٹ پیٹ میں ہی چھوڑدیے گئے ہیں، جس کی وجہ سے تکلیف ہورہی ہے۔ ہارٹ انٹرنیشنل ہسپتال کے ڈاکٹروں نے دوبارہ آپریشن کے بعد تولیہ اور بیلٹ نکالا۔