عروج آفتاب دوسرے سال بھی گریمی ایوارڈ کے لیے نامزد
پاکستانی نژاد امریکی گلوکارہ عروج آفتاب مسلسل دوسرے سال گریمی ایوارڈ کے لیے نامزد ہونے والی پہلی پاکستانی گلوکارہ بن کر سامنے آگئیں۔
عروج آفتاب کو سال 2021 میں پہلی بار ’گریمی‘ ایوارڈ کے لیے نامزد کیا گیا تھا اور انہیں اپریل 2022 میں پہلا ایوارڈ دیا گیا تھا۔
بروکلین میں مقیم گلوکارہ کو حفیظ ہوشیارپوری کی غزل“محبت کرنے والےکم نہ ہوں گے“ گانے پر بہترین عالمی کارکردگی کے ایوارڈ سے نوازا گیا تھا۔ ان سے قبل یہ غزل گلوکار مہدی حسن اور گلوکارہ فریدہ خانم نے بھی گائی تھی۔
اب انہیں سال 2023 کے گریمی ایوارڈز کے لیے بھی نامزد کردیا گیا اور وہ مسلسل دو سال تک موسیقی کے اعلیٰ ترین ایوارڈ کے لیے نامزد ہونے والی پہلی پاکستانی نژاد گلوکارہ بن گئیں۔
عروج آفتاب نے اپنی انسٹاگرام پوسٹ میں بتایا کہ انہیں اور ان کی ساتھی گلوکارہ انوشکا شنکر کو ’بیسٹ گلوبل میوزک پرفارمنس‘ کی کیٹیگری میں ’ادھیڑو نا‘ گانے پر نامزد کیا گیا ہے۔
View this post on Instagram
اس گانے میں بھارتی نژاد برطانوی ستار نواز انوشکا شنکر نے بھی اپنے فن کے جوہر دکھائے ہیں جبکہ یہ گانا عروج آفتاب کے تازہ ترین البم ’ولچرپرنس‘کا حصہ ہے۔
