بلاول بھٹو کی مسجدِ نبوی میں نماز کی ادائیگی، تصویر وائرل
پیپلز پارٹی کی صوبائی کابینہ ان دنوں عمرے کی سعادت حاصل کرنے کےلئے سعودی عرب میں موجود ہے ۔ عمرے پر جانے والوں میں چیئرمین پیپلزپارٹی بلاول بھٹو زرداری سمیت سعید غنی، شرجیل میمن، ناصر حسین شاہ ، سہیل انور سیال اوردیگر رہنماء شامل ہیں ۔
سوشل میڈیا پر پیپلزپارٹی رہنماؤں کی جانب سے عمرے کی ادائیگی کے دوران حرم شریف اور خانہ کعبہ کی وقتاً فوقتاً تصاویر شیئر کی جارہی ہیں ۔ انہی تصاویر میں بلاول بھٹو کی ایک تصویر وائرل ہورہی ہے جس میں وہ سیاہ لباس میں ملبوس مسجدِ نبوی میں سعید غنی اور سہیل انورسیال کے ہمراہ نماز پڑھتے نظر آرہے ہیں۔
چیئرمین پیپلزپارٹی کی نماز پڑھتے پہلی بار تصویر دیکھ کر ان کے چاہنے والے اس تصویر کو خوب شیئر کررہے ہیں۔ جبکہ جیالوں کی جانب سے ان تصاویر کو پسند کیا جارہاہے۔
بلاول کی ایک اورتصویر وائرل ہورہی ہے جس میں وہ مسجدِ نبوی میں بیٹھے ہاتھ میں تسبیح لئے روحانی نعمتوں سے مسرور نظر آرہے ہیں۔
