کراچی: امریکی محکمہ خارجہ کی اعلیٰ عہدیدار، الزبتھ ہورسٹ نے کراچی کا دورہ کیا تاکہ امریکہ اور پاکستان کے درمیان اقتصادی روابط کو فروغ دیا جا سکے اور تجارت و سرمایہ کاری کے میدان میں نئی شراکتوں کے امکانات تلاش کیے جا سکیں۔
دورے کے دوران الزبتھ ہورسٹ نے وزیراعلیٰ سندھ مراد علی شاہ سے وزیراعلیٰ ہاؤس میں ملاقات کی، جہاں باہمی معاشی ترجیحات پر تبادلۂ خیال کیا گیا۔ ملاقات میں امریکہ-پاکستان اقتصادی شراکت داری کو مضبوط بنانے اور صوبے میں نجی شعبے کی قیادت میں کاروبار اور تجارت کے فروغ کے لیے سازگار ماحول پیدا کرنے پر گفتگو ہوئی۔
الزبتھ ہورسٹ نے امریکی بزنس کونسل اور پاکستانی کاروباری نمائندوں کے ساتھ دو الگ الگ ملاقاتیں بھی کیں جن کا مقصد امریکہ اور پاکستان کے درمیان تجارتی روابط کو وسعت دینا اور کاروباری سرگرمیوں میں اضافہ تھا۔
اس کے علاوہ، انہوں نے امریکی مالی معاونت سے چلنے والے ساؤتھ ایشین ریجنل ویمن انوویٹرز مینٹرشپ پروگرام میں شامل پاکستانی خواتین کے ساتھ ایک ملاقات کے دوران خواتین کی اقتصادی خودمختاری اور تکنیکی جدت سے وابستہ امریکی اقدامات پر روشنی ڈالی۔
اپنی تمام ملاقاتوں کے دوران الزبتھ ہورسٹ نے ابھرتے ہوئے شعبوں میں امریکہ-پاکستان تعاون کی وسیع گنجائش کا ذکر کرتے ہوئے کہا:”امریکہ اور پاکستان کے درمیان اقتصادی شراکت داری کی ایک طویل تاریخ ہے، اور ہمیں یقین ہے کہ باہمی تعاون کے ذریعے ہم پاکستان کی معیشت کی مکمل صلاحیت کو بروئے کار لا سکتے ہیں، امریکی کاروباروں کے لیے نئے مواقع پیدا کر سکتے ہیں اور دونوں ممالک کی اقتصادی ترقی میں مثبت کردار ادا کر سکتے ہیں۔””
اعلیٰ سطح کا یہ دورہ امریکی محکمہ خارجہ کی جانب سے پاکستان کے ساتھ اقتصادی شراکت، باہمی خوشحالی اور ترقی کے لیے دیرپا عزم کی عکاسی کرتا ہے، جو امریکہ کی اقتصادی نمو میں بھی معاون ثابت ہو سکتا ہے۔
“محکمہ خارجہ کے بیورو برائے جنوبی اور وسطی ایشیائی امور میں الزبتھ ہورسٹ پرنسپل ڈپٹی اسسٹنٹ سیکریٹری کے طور پر خدمات انجام دے چکی ہیں، جبکہ جولائی 2022 سے جولائی 2025 تک وہ پاکستان کے لیے ڈپٹی اسسٹنٹ سیکریٹری کے عہدے پر فائز رہیں
